Lei de startups

Para acollerse aos beneficios desta lei, unha empresa debe cumprir os seguintes criterios:

• Ser de nova creación ou ter menos de 5 a 7 anos desde a súa inscrición no Rexistro Mercantil.
• Non ter xurdido dunha fusión, escisión ou transformación de empresas non emerxentes.
• Non ter distribuído dividendos.
• Non cotizar en mercados regulados.
• Ter domicilio social ou establecemento permanente en España.
• Contar con polo menos o 60% do cadro de persoal con contrato laboral en España.
• Desenvolver un proxecto innovador cun modelo de negocio escalable.
• Non superar os 10 millóns de euros de facturación anual.
• Estar ao corrente das obrigas tributarias e coa Seguridade Social.
• Non ter sido condenada por delitos económicos ou societarios.

A Empresa Nacional de Innovación (ENISA) é a entidade encargada de certificar as empresas que solicitan ser recoñecidas como startups. Esta certificación, regulada pola Lei 28/2022 e a Orde PCM/825/2023, permite acceder aos beneficios previstos para empresas emerxentes. Para iso, ENISA valora se a empresa cumpre cos seguintes criterios:

1. Grao de innovación

Valórase se a empresa desenvolve produtos, servizos ou procesos novos ou significativamente mellorados. Para iso, téñense en conta:

• A realización de actividades de I+D+i.
• A existencia de rexistros de propiedade industrial ou intelectual.
• A obtención de financiamento público ou privado para innovación.

2. Atractivo do mercado

Valórase se a empresa opera nun mercado con potencial de crecemento e se xerou interese ou tracción. Considéranse aspectos como:

• A oferta e demanda no sector.
• As estratexias de captación e fidelización de clientes ou persoas usuarias.
• A evolución da base de persoas usuarias ou vendas.

3. Fase de desenvolvemento

Valórase se a empresa alcanzou un grao de madurez suficiente no seu produto ou servizo. Téñense en conta:

• A existencia de prototipos funcionais.
• O lanzamento dun produto mínimo viable (MVP).
• A validación inicial no mercado.

4. Modelo de negocio

Valórase se o modelo de negocio é escalable, é dicir, se ten capacidade de medrar de forma sostible. Analízase:

• O crecemento potencial en número de persoas usuarias, operacións ou ingresos.
• A posibilidade de replicar o modelo noutros mercados ou sectores.

5. Competencia e diferenciación

Valórase se a empresa se diferencia claramente doutras no seu sector. Considéranse:

• As características únicas da súa proposta de valor.
• As barreiras de entrada que desenvolveu.
• O seu posicionamento fronte á competencia.

6. Equipo emprendedor

Valórase a experiencia, formación e complementariedade do equipo fundador e directivo. Analízase:

• A traxectoria profesional dos seus integrantes.
• A súa experiencia previa en emprendemento ou sectores relacionados.
• A capacidade do equipo para executar o proxecto.

7. Relacións con terceiros

Valórase a dependencia ou vinculación da empresa con provedores, clientes clave ou outros operadores económicos. Téñense en conta:

• A diversificación de fontes de ingresos.
• A estabilidade das relacións comerciais.

8. Clientes e persoas usuarias

Valórase o volume e o perfil da base de clientes ou persoas usuarias. Considéranse:

• O número de clientes activos.
• O nivel de fidelización.
• O crecemento sostido da base de persoas usuarias.

Unha vez rexistrada a solicitude de certificación xunto á documentación requirida, ENISA dispón dun prazo máximo de 3 meses para emitir a resolución.

Consulta o proceso de certificación en ENISA
 

Incentivos fiscais

Imposto sobre Sociedades

• As startups poden tributar ao 15% durante os catro primeiros anos, sempre que manteñan a súa condición de empresa emerxente.
• Poden aprazar o pagamento do imposto correspondente aos dous primeiros exercicios sen necesidade de garantías nin xuros de demora.
• Están exentas de presentar pagamentos fraccionados durante os dous primeiros exercicios con base impoñible positiva.

Imposto sobre a Renda das Persoas Físicas (IRPF)

• Stock options: a exención fiscal pola entrega de accións a persoas empregadas increméntase de 12.000 a 50.000 euros anuais. Ademais, permítese aprazar o pagamento dos impostos sobre as ganancias que superen ese límite ata que se vendan as accións, a empresa saia a bolsa ou transcorran dez anos. Tamén se establece un criterio específico para calcular o valor das accións ou participacións entregadas, o que facilita a súa valoración fiscal.
• Dedución por investimento en empresas de nova ou recente creación: increméntase a dedución do 30% ao 50%, cunha base máxima de 100.000 euros. O prazo para investir amplíase de 3 a 5 anos, e ata 7 anos para startups de sectores estratéxicos. As persoas fundadoras tamén poden beneficiarse.
• Carried Interest: os rendementos obtidos pola xestión de fondos considéranse rendementos do traballo e intégranse nun 50% da base impoñible, sempre que se cumpran certos requisitos.

Bonificacións para persoas autónomas

• Bonificación do 100% da base mínima de cotización durante tres anos para persoas traballadoras autónomas que lideren unha startup e traballen tamén por conta allea.

Réxime fiscal para impatriados

• Redución de 10 a 5 anos do período previo sen residencia fiscal en España para acceder ao réxime fiscal especial.

Outros beneficios

• Sandboxes regulatorios: posibilidade de operar en contornos de proba con licenzas temporais.
• Visado para nómades dixitais: regulación específica para persoas estranxeiras que traballen en remoto desde España.
• Redución de garantías: posibilidade de solicitar unha diminución proporcional das garantías esixidas para acceder a subvencións ou anticipos.

Quen pode ser nómade dixital?

Nacionais de terceiros países que residen en España mentres traballan en remoto para empresas estranxeiras, clasificados como:

• Traballadores por conta allea: só poden traballar para empresas fóra de España.
• Profesionais / Traballadores por conta propia: poden traballar ata un 20% para empresas españolas.

Requisitos

Ademais de cumprir os requisitos xerais para residir ou permanecer en España, as persoas que soliciten un visado ou autorización de teletraballo deben acreditar o seguinte:

• Actividade da empresa: a empresa estranxeira para a que traballan debe ter unha actividade real e continuada durante polo menos un ano.
• Traballo en remoto: o posto debe ser totalmente compatible co teletraballo mediante o uso de medios dixitais.
• No caso dunha relación laboral: débese acreditar unha relación laboral coa empresa estranxeira durante polo menos os tres meses previos, e esta relación debe permitir expresamente o traballo a distancia.
• No caso de actividade profesional ou freelance: débese demostrar unha relación comercial cunha ou varias empresas estranxeiras durante polo menos tres meses, e as condicións para o traballo en remoto deben estar claramente definidas.

Vixencia

• Visado: ata 1 ano.
• Autorización de residencia: ata 3 anos, renovable cada 2 anos.